چرا کابل فعالیت «کمیته سویدن برای افغانستان» را تعطیل کرد؟

به گزارش خبرنگار خبرگزاری ایرنا در کابل؛ مسئولان «کمیته سویدن برای افغانستان»، به تاریخ 25 ماه حوت سال گذشته(1402)، به رادیو سویدن گفته بودند که این کمیته از روز جمعه 25 حوت، رسماً تمامی فعالیت‌های خود را در افغانستان متوقف کرده‌‌ است.

مسئولان کمیته سویدن برای افغانستان گفته بودند که فعالیت‌های خود را در افغانستان به دلیل فشار طالبان، متوقف کرده ‎است.

اما اینکه چرا مقامات دولت سرپرست افغانستان، فعالیت‌های این کمیته را که از سال 1980 میلادی با هشت هزار همکار افغان در 18 ولایت مشغول به فعالیت است، مسدود کرده، سؤالی است که سخنگوی وزارت اقتصاد دولت در گفتگوی با «ایرنا» به آن پاسخ داده است.

عبدالرحمان حبیب سخنگوی وزارت اقتصاد دولت سرپرست افغانستان امروز یک‌شنبه 5 حمل، در صحبت با خبرنگار خبرگزاری ایرنا در کابل، گفت: بعد از آنکه در کشور سویدن اجازه توهین به مقدسات اسلامی داده شد و قرآن به آتش کشیده شد، امارت اسلامی افغانستان تمامی فعالیت‌های کمیته سویدن برای افغانستان را متوقف کرد.

به گزارش ایرنا، پیش‌تر برخی رسانه‌ها از دستور توقف کامل فعالیت‌های «کمیته سویدن برای افغانستان» و مصادره اموال و تجهیزات آن توسط دولت سرپرست افغانستان خبر داده بودند.

پایان پیام/